A short novel about a young radio researcher who delves into the mysterious disappearance of a folk rock singer from the area twenty years previously; with useful notes and glossary for Welsh Learners.

Nofel fer ysgafn am ymchwilydd ar raglen radio yn ceisio datrys dirgelwch diflaniad canwr roc gwerin o'r fro ugain mlynedd ynghynt; cynhwysir nodiadau a geirfa ddefnyddiol ar gyfer Dysgwyr.

Mae Pwy sy’n Cofio Siôn? yn perthyn i gyfres 'Nofelau Nawr' a gyhoeddir gan Wasg Gomer. Anelwyd y gyfres at ddysgwyr sydd wedi bod yn dysgu Cymraeg ers blwyddyn neu ddwy. Tra bod y testun i gyd yn Gymraeg, ar waelod pob tudalen mae geirfa fer – sy’n syniad da gan nad oes, yn fy mhrofiad i, ddim byd gwaeth wrth ddarllen llyfr na gorfod mynd i chwilio yn y geiriadur am ystyr geiriau diarth! Wedi dweud hyn, os yw’r dysgwr am droi at eiriadur yn yr achos hwn, ceir manylion e.e. enw benywaidd, lluosog wedi eu nodi wrth y geiriau er mwyn hwyluso pethau, a nodir geiriau sydd wedi’u treiglo yn eu ffurf wreiddiol. Hefyd, mae yna adran fer yng nghefn y llyfr sy’n defnyddio enghreifftiau o’r stori er mwyn egluro ychydig ar y ramadeg.

Prif gymeriad y nofel yw Leni. Ei huchelgais yw cael swydd bwerus yn y cyfryngau a bod yn enwog. Am nawr, fodd bynnag, mae’n rhaid iddi fodloni ar weithio fel ymchwilydd ddi-dâl i orsaf radio leol er mwyn ennill profiad.

Pan ofynna pennaeth yr orsaf radio iddi chwilio am wybodaeth ar Siôn Tremthanmor, canwr enwog a ddiflannodd ugain mlynedd ynghynt, mae Leni’n gweld ei chyfle i geisio darganfod beth ddigwyddodd i Siôn a'i phrofi ei hun fel newyddiadurwraig o fri. Mae hi’n penderfynu mai hi fydd yr un fydd yn dod o hyd i Siôn ac y bydd y clod am hyn yn arwain at yrfa lwyddiannus ac enwogrwydd. Mae’r chwilio am Siôn yn datblygu’n obsesiwn ganddi wrth iddi ddilyn un llwybr ar ôl y llall i geisio dod o hyd i’r gwir.

Mae hon yn nofel gyffrous ac yn anodd ei rhoi i lawr, wrth i Leni ddod yn nes ac yn nes at ddatrys y dirgelwch. (Yn wir, mae’n hawdd anghofio mai nofel i ddysgwyr yw hon gan mai’r stori ac nid yr iaith sy’n dal y sylw.) Bob tro mae’n ymddangos ei bod bron â dod o hyd i Siôn, mae’n cael ei siomi. Ond nid yw Leni’n ferch i roi’r gorau iddi, ac mae hi’n benderfynol o ddod o hyd i Siôn.

Cefais flas ar y nofel hon. Er ei bod yn stori eithaf byr (89 tudalen), mae digon o gyffro a thyndra yma. At ddysgwyr y bwriadwyd y llyfr yma, ond fe fyddwn i’n ei argymell hefyd i siaradwyr Cymraeg, yn arbennig i’r rhai sydd heb ddigon o hyder i ddarllen llyfrau Cymraeg yn arferol.

Teleri Jones

Gellir defnyddio'r adolygiad hwn at bwrpas hybu, ond gofynnir i chi gynnwys y gydnabyddiaeth ganlynol: Adolygiad oddi ar www.gwales.com, trwy ganiatâd Cyngor Llyfrau Cymru.

It is possible to use this review for promotional purposes, but the following acknowledgment should be included: A review from www.gwales.com, with the permission of the Welsh Books Council.