'Does dim byd gwell er mwyn denu plentyn i ddarllen na stori sy'n cynnig llond bol o chwerthin. Bonws ychwanegol yw fod hiwmor y Ilyfr hefyd yn apelio'n fawr at rieni, a dyna'n sicr beth a geir yn y tair stori fach hyn. Hanes ymdrechion mam ac athrawon i gael bachgen styfnig fel mul i wisgo'i siwt eira frown 'hyll' a geir yn Siwt Eira Tomos. Adrodd am helyntion Megan wrth ollwng y 'creaduriaid mwyaf twp' a welodd erioed allan o'u twlc a wneir yn Moch, ac yn y drydedd stori, 'Dwi eisiau mynd!, cawn olwg ar yr helynt y mae bachgen o'r enw Andrew yn ei achosi wrth iddo benderfynu 'peidio byth â phi-pi eto' - er mawr ddifyrrwch i'r darllenydd. Fe'n denir ni'n syth gan ddiwyg lliwgar y llyfrau yn ogystal â chan hiwmor bywiog ac iach y straeon. Mae'r tair stori'n hawdd i'w darllen; ceir yma ailadrodd pwrpasol, ac mae maint y print yn addas ar gyfer plant, sy'n cael eu cymell i ddarllen ar eu pennau eu hunain. Credaf fod addasiadau Iwan Llwyd o'r tair stori yn hynod raenus. Braf yw cael testun naturiol a chyhyrog, ac ambell ddisgrifiad gafaelgar, er enghraifft y disgrifiad o'r moch yn sefyll 'fel swigod ar blorod'. Mae'r sefyllfaoedd sylfaenol ddoniol yn ddeniadol dros ben. Yn wir, pa riant sydd heb glywed nain neu fam-gu yn doethinebu, 'Chefais i rioed y problemau hyn gyda 'mhlant i?' Dyma dair o'r storïau doniolaf yr wyf wedi eu darllen ers tro, ac mae'n braf dweud iddynt gael eu haddasu'n Ilwyddiannus i'r Gymraeg. Bydd croeso mawr iddynt.
Delyth Parry Huws (Llais Llyfrau)