Addasiad Cymraeg o Someone Bigger, stori fywiog a lliwgar ar ffurf rhigymau yn darlunio trafferthion bachgen bach a'i dad wrth iddynt fynd i hedfan barcud yn y parc ar ddiwrnod gwyntog; i blant 3-5 oed.

A Welsh adaptation of Someone Bigger, a lively and colourful story in rhyming form portraying the troubles of a young boy and his father as they go to fly a kite in the park on a very windy day; for children aged 3-5 years.

`Na chei, ti'n rhy fach!' Dyna eiriau mae'r rhan fwyaf o blant bach yn eu clywed yn llawer rhy aml, ond dyma lyfr sy'n herio'r geiriau hynny ac yn siŵr o apelio at bob plentyn bach rhwystredig! Yn wir, erbyn i ni gyrraedd y tudalen olaf, roedd fy mhlentyn 5 oed i yn neidio ar y gwely ac yn gweiddi hwrê mawr wrth i'r bachgen bach yn y stori brofi'r geiriau hyn yn anghywir.

Ar ôl treulio'r bore yn adeiladu barcud anferth, mae Llŷr a'i dad yn mynd allan i'r gwynt i'w hedfan. Ond pan mae Llŷr yn gofyn am gael y tro cyntaf, mae Dad yn dweud wrtho nad yw'n ddigon mawr i afael yn y cortyn . . . a dyna lle mae'r hwyl a'r helynt yn cychwyn. Mae'r barcud yn codi Dad i'r awyr, ac yna cawn gyfres o bobl ac anifeiliaid eraill sy'n trio ei achub. Ynghanol yr helynt, mae Llŷr yn galw drosodd a drosodd 'Plis a ga i gyfle? Nid babi ydw i nawr!' dim ond i gael ei wrthod ganddyn nhw i gyd, 'Mae'n RHAID cael rhywun mawr!' Dim ond pan fydd Llŷr yn gafael yn y cortyn o'r diwedd y mae'r helynt yn dod i ben a'r sefyllfa'n cael ei datrys.

Mae'r stori'n cael ei hadrodd yn effeithiol ar fydr llac, gyda rhythmau'r brawddegau, yr odlau a'r ailadrodd yn ychwanegu at y cyffro. Rhaid canmol hefyd y lluniau deniadol sy'n rhoi digon o gyfle i drafod y stori fel y mae'n datblygu.

Ann Hawke

Gellir defnyddio'r adolygiad hwn at bwrpas hybu, ond gofynnir i chi gynnwys y gydnabyddiaeth ganlynol: Adolygiad oddi ar www.gwales.com, trwy ganiatâd Cyngor Llyfrau Cymru.

It is possible to use this review for promotional purposes, but the following acknowledgment should be included: A review from www.gwales.com, with the permission of the Welsh Books Council.