Nofel yn y gyfres o gyfrolau byr a chyflym Stori Sydyn. Yn hon cawn stori am ferch ifanc sydd wedi cael ei threisio ym Mhencraig. Rhaid i DCI Mat Francis ddod o hyd i'r ymosodwr cyn iddo dreisio a lladd merch ifanc arall. Mae ei yrfa'n dibynnu ar hynny. Ond mae Jake, brawd Mat, hefyd ar y trywydd. Gohebydd ydy Jake, ac mae ganddo drwyn am stori. Stori fawr.

A novel in the short and fast-paced series Quick Reads. In this story a young girl has been murdered at Pencraig. DCI Mat Francis must catch the villain before he rapes and kills another young girl. His career depends on it. But Jake, Mat's brother, is also on the case. Jake is a journalist and has a nose for a story. A big story.

Thriller ydi Jake am ddau frawd sy’n mynd ar drywydd treisiwr a llofrudd yn nhref (ddychmygol) Pencraig yng Ngwynedd. Detective Chief Inspector Mat Francis ydi’r brawd hynaf, sydd dan bwysau cynyddol i ddal y ‘Black Rapist’ (a gafodd y llysenw am ei fod yn gwisgo mwgwd du) ar ôl i hwnnw daro eto. Gohebydd efo’r Sunday News ym Manceinion ydi Jake, ac mae yntau hefyd yn awyddus i ddal y treisiwr – a chael scoop yn y fargen!

Jake ydi prif gymeriad y nofel: tynnwr coes a thipyn o charmer efo trwyn am stori. Chwedl yr awdur, ‘Roedd Jake yn gallu deud celwydd fel tasa fo’n deud y gwir’ – dawn sy’n ei alluogi i gael pobl (ond nid pawb!) i ymddiried ynddo wrth iddo’u holi.

Daw Jake yn dipyn o ffrindiau efo Nan Vaughan, athrawes ymarfer corff sy’n llwyddo i ddianc ar ôl i’r treisiwr ymosod arni. Arferai Non fod yn ddisgybl yn Ysgol Pencraig efo’r ddau frawd, pan oedd Jake yn ‘hogyn digon diniwed . . . yn cael ei fwlio gan rai o’r hogia eraill’. Gwahanol iawn i’r dyn mawr cry sy’n reidio moto-beic pwerus ac yn ddigon tebol i edrych ar ôl ei hun bellach!

Rhyngddynt, mae Jake a Mat yn mynd ati i ddatrys y dirgelwch a dod yn nes at ddal y treisiwr. Ac yn nhraddodiad straeon arswyd fel The Silence of the Lambs, caiff y darllenydd gip ar feddwl y treisiwr hefyd, a’r hyn sy’n ei yrru i gyflawni troseddau mor erchyll.

Ond pwy ydy’r treisiwr? Ai un o selogion brith y King’s Head? Ynteu un o ddisgyblion neu staff Ysgol Pencraig? Mae’n ddigon posib y byddwch chi wedi dyfalu cyn y diwedd, ond gwyliwch – mae yna dro annisgwyl yng nghynffon y stori!

Dyma nofel gyffrous, hawdd iawn ei darllen. Mae’r iaith yn syml, efo Jake (a’r darllenydd, o bosib) yn dysgu rhai geiriau Cymraeg newydd wrth fynd ymlaen, ac ambell un – fel ‘garlleg’ a ‘diheintydd’ – yn allweddol i’r plot!

Elin Llwyd Morgan

Gellir defnyddio'r adolygiad hwn at bwrpas hybu, ond gofynnir i chi gynnwys y gydnabyddiaeth ganlynol: Adolygiad oddi ar www.gwales.com, trwy ganiatâd Cyngor Llyfrau Cymru.

It is possible to use this review for promotional purposes, but the following acknowledgment should be included: A review from www.gwales.com, with the permission of the Welsh Books Council.