Pennod 1 YR ESTHETIG A GWLEIDYDDIAETH YR YMYLON: CYFLWYNIAD

1.1 Yr ysgrifol a’r esthetig
1.2 Gwleidyddiaeth ddemocrataidd a’r esthetig 1

Pennod 2 ‘CODI SGWARNOGOD’ TWM MORYS A CHENEDLAETHOLDEB DIWYLLIANNOL

2.1 Sgwarnogrwydd fel trosiad estynedig
2.2 Beirniadu ideoleg?
2.3 Ideoleg greadigol
2.4 Gwleidyddiaeth ddemocrataidd a’r esthetig 2

Pennod 3 YR ESTHETIG GWLEIDYDDOL YN NHESTUNAU YSGRIFOL BOHUMIL HRABAL a VÁCLAV HAVEL

3.1 Václav Havel, y ffigurol a’r syniad o gyfrifoldeb yn Dopisy Olze (Llythyrau at Olga)
3.2 Cronicladau llenyddol Bohumil Hrabal o’r Chwyldro Felfed a Dopisy Dubence (Llythyrau at Dubenka)

Pennod 4 ADFER YR ESTHETIG

4.1 Yr ysgrifol fel esthetig radical?
4.2 Yr esthetig ar waith ar yr ‘ymylon’

Pennod 5 CASGLIAD

LLYFRYDDIAETH

MYNEGAI

Mae Dr Sioned Puw Rowlands yn gyfarwyddwr asiantaeth Llenyddiaeth Cymru Dramor, sydd yn hyrwyddo cyfieithu llenyddiaeth Cymru yn rhyngwladol. Ymhlith ei chyhoeddiadau eraill y mae Byd y Nofelydd (Y Lolfa) a Diogi a Chynhyrfu (Gwasg Gwynedd). Hi yw un o gyd-sylfaenwyr y cylchgrawn ar-lein Transcript Review a’r rhwydwaith Ewropeaidd Literature Across Frontiers.

Mae’r gyfrol hon yn archwilio’r berthynas rhwng yr esthetig, ideoleg a’r ysgrifol mewn testunau gan Twm Morys a dau awdur Tsiec, sef Bohumil Hrabal (1914–1997) a’r cyn-arlywydd Václav Havel (1936–).
Dadleuir bod y testunau hyn yn ymwneud â’r esthetig mewn modd deinamig, yn wahanol i’r syniad o’r esthetig fel anesthetig, fel rhywbeth anwleidyddol, a ddisgrifiwyd gan gryn dipyn o theori’r ugain mlynedd ddiwethaf – theori a luniwyd ar y cyfan yng nghyd-destun diwylliannau mwyafrifol. Dadleuir fod yr esthetig yn chwarae rhan sylfaenol yng ngwleidyddiaeth yr awduron, sydd yn ymwneud â safbwyntiau lleiafrifol.
Wrth archwilio’r llinellau cyswllt rhwng yr ysgrifol a’r tensiynau sydd wrth wraidd yr esthetig trwy gyfrwng testunau Twm Morys, Václav Havel a Bohumil Hrabal, gofynnir i ba graddau y gallai’r ddau fodd fod yn arbennig o atyniadol i gymunedau sydd wedi eu hymylu.
Archwilir rôl trosiadau yng nghenedlaetholdeb diwylliannol Twm Morys, y ffigurol fel elfen angenrheidiol yng nghysyniad Václav Havel o gyfrifoldeb, a chroniclau llenyddol Bohumil Hrabal o Chwyldro Melfed Tsiecoslofacia yn Nhachwedd 1989 – hyn yng ngoleuni’r cwestiwn i ba graddau y mae’r cyfluniadau arbennig hyn o’r ysgrifol a’r esthetig, ynghyd â chonsýrn gwleidyddol penodol y testunau dan sylw, yn creu esthetig radical.