Dyma'n sicr dorri tir newydd! Cyfrol o straeon erotig gan naw awdures amlwg iawn – bron bob un ohonynt wedi cyhoeddi cyfrol neu gyfrolau o'u gwaith eu hunain, ac yn cael eu hystyried ymhlith prif awduron Cymru heddiw.

Mae pob math o bethau difyr yn gallu cael eu trafod gan ferched dros baned a brechdan. A dyna’n union ddigwyddodd pan ddaeth criw bychan o awduresau ynghyd yn Nhŷ Newydd, Llanystumdwy. Canlyniad y sgwrs honno yw’r llyfr Tinboeth – deg o straeon erotig gan ferched.


Bethan Gwanas sy’n gyfrifol am olygu’r gyfrol, sy’n cynnwys straeon byrion gan Caryl Lewis, Fflur Dafydd, Meg Elis, Eigra Lewis Roberts, Gwyneth Glyn, Siân Northey, Lleucu Roberts a Gwen Lasarus, yn ogystal â’r golygydd ei hun. Un o’r pethau mwyaf nodweddiadol am y gyfrol yw nad yw’r darllenwyr yn gwybod pa awdures sydd wedi sgwennu pa stori.


Meddai Bethan, “Gan fy mod i wedi hen arfer, roeddwn i’n gwbl hapus i roi fy enw wrth fy stori i. Ond roedd rhai o’r lleill yn teimlo’n gry tasan nhw’n gallu bod yn ddienw, mi fysan nhw’n fwy rhydd i sgwennu. Roedd rhai ohonyn nhw ofn pechu eu mamau, eu neiniau, neu hyd yn oed eu gwŷr efallai, dwi’m yn gwbod!”


Mae arddull y straeon yn amrywio, rhai’n ysgafn gyda digon o hiwmor ynddynt, rhai eraill sy’n fwy mentrus, a rhai‘n hyfryd o farddonol a synhwyrus.


Ychwanega Bethan, “Y brîff roddais i i bawb oedd mai dyma’r math o lyfr ‘dan ni isio i bobl ei ddarllen ar eu gwyliau, neu’n ymlacio dros lasiad o win. Mae ‘na alw wedi bod am lyfr fel hyn yn Gymraeg ers talwm, ac mae’r pwyslais ar yr erotig yn hytrach na’r budur, gobeithio!”


Y peth mwya difyr, wrth gwrs, fydd ceisio dyfalu pa awdures sy’n gyfrifol am ba stori. Ond i’r perwyl hwnnw, tydi Bethan yn rhoi dim i ffwrdd.


“Dienw ydi’r straeon yn y llyfr, a dienw fyddan nhw’n aros! Mae ambell awdures hyd yn oed wedi mynd allan o’i ffordd i guddiad ei steil. Dwi’n meddwl bod y’n steil i’n gwbl amlwg, ond camp i chi ddyfalu’r gweddill!”.


Mae yma straeon amrywiol o ran naws – rhai yn dyner a chynnil, eraill yn fwy uniongyrchol yn arbennig yn eu hymdriniaeth o ryw (ond heb fod byth yn bornograffig).


Yng ngeiriau Bethan Gwanas, y golygydd – 'y math o lyfr fyddech chi'n dymuno ei ddarllen ar eich gwyliau efo gwydraid o siampên neu sangria wrth eich ochr – a gwên ar eich wyneb!'