Dyma'r trydydd o ddyddiaduron Bethan Gwanas yn dilyn llinellau 'Ar y Lein'; ei hanes yn dilyn y cyhydedd o amgylch y byd ydi hwn. Ceir nifer o straeon difyr ynghyd â'i sylwadau hithau am amrywiaeth y diwylliannau a'r arferion, a'r systemau gwleidyddol ac economaidd y daeth ar eu traws.

The third lively and engaging diary of Bethan Gwanas's travels - this time following the equator. Many tales are recounted, together with her comments on the various cultures encountered, and the different politics and economies she experienced in different countries.

Mae Bethan Gwanas yn deithwraig fentrus sydd yn gêm am bob math o anturiaethau wrth ffilmio cyfresi Ar y Lein ar gyfer S4C. Dyma’r trydydd dyddiadur iddi ei ysgrifennu yn cofnodi ffilmio’r cyfresi hyn. Mae cip sydyn ar y lluniau yn y gyfrol yn ddigon i ddweud wrthych nad yw hon yn mynd i fod yn siwrnai gyffredin gonfensiynol ar hyd y cyhydedd. Gallwch gymryd yn ganiataol fod arweinlyfrau fel y Rough Guide a'r Lonely Planet am Kenya, Brasil ac Ecuador wedi cael ffling, neu wedi'u gadael ar y silff yn Rhydymain, wrth i’r awdur fynnu dewis ei lleoliadau ei hun er mwyn treiddio o dan yr wyneb a mynd yn agosach at y bobl sydd yn gwneud y llefydd yma’n ddiddorol.

Yn ogystal â dal chwyddwydr uwchben diwylliant y gwledydd, mae’r dyddiadur yn gofnod dadlennol o’r broses ffilmio a’r pwysau sydd ar bawb i weithio i amserlen anodd, yn ogystal â delio gyda ffactorau annisgwyl. Edrychwch ar y dyddiadau, gwnewch eich sỳms, a buan y dewch i sylweddoli nad jolihoetian yw ffilmio dramor.

Fel y ffilmio, cyflym iawn yw’r ysgrifennu hefyd. Nid oes lle i ddisgrifiadau manwl o’r daith, ac mae angen camu'n ôl ambell waith i atgoffa’ch hun pa wlad yr ydych ynddi. Ond mae arddull pytiog ac anffurfiol y dyddiadur yn gwneud y gyfrol yn ddarllenadwy iawn. Colled i ni’r darllenwyr yw na chafodd yr awdur fwy o amser i ‘fynd yn frodorol’, a threulio cyfnodau hirach yn y llefydd bu’n ymweld â hwy.

I deithwyr annibynnol, mae’r llyfr yn ysbrydoliaeth wrth i chi weld faint sydd i’w weld a’i ddarganfod mewn gwledydd tu hwnt i’r radar twristaidd. Beth sydd ei angen i fwynhau teithio? Meddwl agored, synnwyr digrifwch, parodrwydd i siarad a gofyn cwestiynau i bobl. Dyma ddawn yr awdures yma ac mae'n wers i ni gyd wrth fynd y tu hwnt i’n cynefin.

Emyr Williams

Gellir defnyddio'r adolygiad hwn at bwrpas hybu, ond gofynnir i chi gynnwys y gydnabyddiaeth ganlynol: Adolygiad oddi ar www.gwales.com, trwy ganiatâd Cyngor Llyfrau Cymru.

It is possible to use this review for promotional purposes, but the following acknowledgment should be included: A review from www.gwales.com, with the permission of the Welsh Books Council.