Nofel afaelgar ar gyfer oedolion, am ffrindiau a chariadon, am rywioldeb, twyll a chyfrinachau. Fe'i lleolir yn bennaf ym mherfeddion Ffrainc, a hynny yn anterth un haf poeth pan mae'r gwres yn llethol, ond y storm a'r taranau byth yn bell iawn. Mae Esyllt wedi marw, ond mae hi'n dal yno, yn dal i chwarae un cymeriad yn erbyn y llall. Adargraffiad; cyhoeddwyd yn 2008.

A novel about friends and lovers, about sexuality, deceit and secrets. It is set mainly in the heart of France, during one hot summer when the heat is sweltering, but the thunderstorm isn't far away. Esyllt is dead, but she's still there, playing one character against the other. Reprint; first published in 2008.

Tŷ haf yn ardal Poitou-Charentes, Ffrainc, ydy’r Maison du Soleil. Bob haf ers saith mlynedd byddai criw o ffrindiau – Tim ac Esyllt, Ben a Cadi, Gareth a Non – yn cyrraedd y Maison yn un haid am bythefnos yn yr haul. Ond mae pethau’n wahanol y tro hwn.

Yn dilyn marwolaeth Esyllt, perchennog y tŷ, mae Tim ei gŵr yn penderfynu gwahodd y pedwar arall i dreulio haf arall yn y Maison. Ond nid pawb sy’n hapus o dderbyn gwahoddiad Tim. Gydag absenoldeb Esyllt fel cysgod dros y criw, mae gan bob un ei resymau dros deimlo’n anghyfforddus yn y tŷ ac yng nghwmni ei gilydd, er mai derbyn y gwahoddiad a mynd i Ffrainc y gwna pob un yn y pen draw.

Mae’r tensiwn yn y Maison yn amlwg, gyda phob aelod yn meddu ar gyfrinach, a’r awyrgylch o dwyll a drwgdeimlad yn dew drwy’r tŷ. Ond cynyddu wna’r tensiwn gyda’r newyddion y bydd llythyr gan Esyllt, a adawyd yn ei ewyllys, yn cyrraedd y Maison cyn diwedd y gwyliau, gan sicrhau fod Esyllt yn dal i reoli’r pethau, yn union fel pan oedd hi’n fyw.

Wrth i’r pum ffrind geisio dianc rhag presenoldeb Esyllt a’i gafael ar ei bywydau, a fydd modd iddynt ddod i delerau â’r gorffennol a symud ymlaen? Sut effaith gaiff y gwyliau ar y berthynas rhwng y pum ffrind? A beth fydd dyfodol y Maison du Soleil?

Dyma nofel afaelgar, sy’n delio â materion yn ymwneud â ffrindiau, cyfeillgarwch, cariadon, a thwyll. Mae’r stori’n frith o gyfrinachau a throeon, ac mae gan bob cymeriad rhywbeth i’w guddio. Ceir cipolwg i ddyfnderoedd personoliaeth y cymeriadau, eu hofnau a’u dyheadau, a’u barn am ei gilydd. Yma ceir darlun o gwlwm criw o ffrindiau sy’n datod yn sydyn ac yn amlwg wedi i’r un person oedd yn eu dal at ei gilydd farw.

Mae tywydd hafaidd a gwres tanbaid lleoliad y nofel yn llifo o’r tudalennau, gyda disgrifiadau niferus o dirwedd Ffrainc. Dyma nofel a chydymaith addas iawn ar gyfer gwyliau haf.

Gwenno Dafydd

Gellir defnyddio'r adolygiad hwn at bwrpas hybu, ond gofynnir i chi gynnwys y gydnabyddiaeth ganlynol: Adolygiad oddi ar www.gwales.com, trwy ganiatâd Cyngor Llyfrau Cymru.

It is possible to use this review for promotional purposes, but the following acknowledgment should be included: A review from www.gwales.com, with the permission of the Welsh Books Council.