Jenny Ogwen – Glaw a Hindda

Mae Jenny Ogwen, un o bersonoliaethau mwyaf poblogaidd teledu Cymru dros y blynyddoedd, wedi mynd ati i groniclo'i hanesion difyr a phrif ysbrydoliaeth ei bywyd yn ei hunangofiant, Glaw a Hindda. Mae’r teitl yn dwyn i gof ei chyfnod fel cyflwynydd tywydd enwog S4C; hollol addas felly yw mai o bencadlys y sianel ar 21ain o Dachwedd y caiff y llyfr ei lansio, gydag ail ddigwyddiad ar y 24ain o Dachwedd yn un o hoff leoliadau Jenny, Clwb Golff Trefdraeth, Sir Benfro.

Cawn gipolwg yn y llyfr ar ddatblygiad y diwydiant teledu yn y Deyrnas Unedig. Gyda S4C yn dathlu chwarter canrif o’i fodolaeth ac ITV yn dathlu hanner can mlynedd o fodolaeth, cawn ddilyn Jenny ar ei thaith drwy hanes darlledu. Daeth Jenny’n enw cyfarwydd wedi iddi gyd-gyflwyno’r rhaglen Siôn a Siân gyda Dai Jones Llanilar. Ar un cyfnod bu’n gweithio i HTV, BBC, S4C a Thames TV yn Llundain. Er iddi gyfaddef ei bod yn dipyn o gamp jyglo’r cyfan, fel cyflwynwraig lawrydd, teimlai fod yn rhaid iddi gymryd y gwaith i gyd rhag ofn iddo ddod i ben.

Mae Jenny wedi byw ei bywyd yng ngolwg y cyhoedd; fe gafodd ei blas cyntaf o fyd yr enwogion pan gyfarfu â Gregory Peck tra bod y seren hwnnw'n ffilmio Moby Dick yn Abergwaun. Cyfaddefa Jenny iddi fod yn ffan mawr o ffilmiau fyth ers hynny. “Fel merch ifanc dwi’n cofio cael fy nghyfareddu gan wychder y diwydiant ffilm. Fy mreuddwyd wedd i allu nofio fel Esther Williams ac i edrych fel Debbie Reynolds,” dywedai dan chwerthin.

Mae hi hefyd yn datgelu ei bod yn dal i edmygu selebs yr “A-list”. Un o’i hoff bynciau i ddechrau sgwrs yw llun ohoni hi a Syr Tom Jones, a gafodd ei argraffu ar fag Anya Hindmarch fel anrheg gan ei phlant – ei mab Rhodri Ogwen Williams, y cyflwynydd teledu adnabyddus, a’i merch Sara a ddaeth i amlygrwydd ar droad y mileniwm wrth fodelu’r ffrog enwog wedi ei gwneud o faner y ddraig goch.

Yn ei harddegau cafodd Jenny ei blas cyntaf o serennu pan gafodd ei choroni’n Miss Norvic Teenager of the Year mewn digwyddiad mawreddog yng Ngwesty’r Mayfair yn Llundain. Yn ogystal â chael ei llun wedi ei gymryd yn broffesiynol a chwrs modelu yn Asiantaeth Modelu Lucie Clayton, fe enillodd freuddwyd miloedd o ferched – sef 21 pâr o esgidiau Norvic! Adrodda Jenny’r hanes yn y llyfr yn ei dull diymhongar wrth iddi gofio eistedd mewn cerbyd crisial hudol a theimlo fel Sinderela.

“Wedd yr achlysur yn ffantastig”, meddai. “Fe wnes i roi i mewn am y gystadleueth heb lawer o feddwl a bod yn onest. Felly wedd hi’n sioc i gael heibio’r rowndiau cynnar yng Nghaerdydd a Bryste a wên i’n wir methu credu’r peth pan wnes i ennill. Wedd hi’n sioc, ond nid hanner cymaint o sioc â gweld cyment o wynebe cyfarwydd ac annwyl o Grymych yn y gynulleidfa. Wedd hi’n hyfryd eu cael nhw yno yn Llunden yn fy nghefnogi.”

Mae gwreiddiau Jenny yn Sir Benfro wedi chwarae rhan allweddol yn ei bywyd. Mae’n gosod gwerth enfawr ar ei pherthynas gyda’i rhieni ac yn teimlo bod ei magwraeth hapus wedi chwarae rhan flaenllaw yn ei bywyd. Gellir clywed seiniau ac acenion sir enedigol Jenny yn ei llais melfedaidd – ac yn wir mae’r llyfr wedi ei ysgrifennu yn y dafodiaith hon.

“Dyna pwy wdw ’i”, esbonia Jenny. “Ma’r llyfr hwn wedi'i sgrifennu fel wdw i’n siarad, yng Nghymrag Sir Benfro. Mae’n dafodieth gyfoethog ac yn ddigon hawdd i’w ddeall. Mae geirie fel ‘wedd’ am ‘oedd’ neu ‘roedd’, ‘wên i’ am ‘roeddwn i’ neu ‘wer’ am ‘oer’ yn frith drwy’r llyfr. Os chi’n stryglan, gwedwch be chi’n weld a falle daw e’n gliriach bryd ‘ny. Gobitho ta beth!”