Cant arall o ffeithiau rygbi a'r diweddaraf yn y gyfres o lyfrau poced ar thema rygbi a phêl-droed gan Gary Pritchard. Cartwnau gan Philip Prendergast.

Another 100 facts about rugby and the latest in a series of pocket size books on football and rugby by Gary Pritchard. Cartoons by Philip Prendergast.

Dyma’r ail lyfr yng nghyfres Ffeithiau Rygbi gan Gary Pritchard. Mae’n cynnwys 100 o ffeithiau diddorol ac anarferol am fyd y bêl hirgron. Os yw rygbi at eich dant, mae’r llyfryn bach hwn, sy’n llawn gwybodaeth, yn hanfodol i chi. Dyma lyfr hwylus y gallwch ei gadw ym mhoced tin eich trowsus fel bod ffeithiau difyr ar flaenau'ch bysedd, e.e. yn 1877, roedd yn rhaid i’r dyfarnwr ddod â gêm rhwng Caerdydd a Llanelli i ben yn gynnar wedi i’r dorf ddwyn y bêl! Dim ond trwy ddarllen y llyfr hwn y cewch wybod sawl potel o champagne sydd ei hangen i lenwi Cwpan Pencampwriaeth y Chwe Gwlad! Wyddech chi beth oedd enw’r chwaraewr o Ffrainc a dorrodd ei ffêr cyn iddo hyd yn oed sefyll ar y maes chwarae, wedi iddo faglu ar y staer y tu allan i’r ystafelloedd newid?

I ychwanegu at ddifyrrwch y llyfr, ceir cartwnau gan Philip Prendergast. Er enghraifft, ynghlwm â’r ffaith bod enw barddol gan rai o enwogion y byd rygbi, mae cartŵn o Gareth Edwards, Gareth Davies, Robin McBryde a Ray Gravell yn eu gwisgoedd gorseddol.

Dyma’r llyfr perffaith er mwyn dangos eich hun o flaen eich ffrindiau! Felly, beth bynnag fo’ch oedran, mae’n werth darllen y llyfr hwn i ehangu’ch gwybodaeth am rygbi a syfrdanu’ch ffrindiau ar y bws, yn yr ysgol, yn y gwaith, yr ystafell newid neu’r dafarn – ewch amdani!

Llŷr Evans

Gellir defnyddio'r adolygiad hwn at bwrpas hybu, ond gofynnir i chi gynnwys y gydnabyddiaeth ganlynol: Adolygiad oddi ar www.gwales.com, trwy ganiatâd Cyngor Llyfrau Cymru.

It is possible to use this review for promotional purposes, but the following acknowledgment should be included: A review from www.gwales.com, with the permission of the Welsh Books Council.