Awdur yn defnyddio chwedloniaeth a hud er mwyn annog plant i ddarllen yn Gymraeg

Wrth i wyliau’r haf ddechrau, gwelir plant ac oedolion leled y byd â’u trwynau’n ddwfn mewn llyfr wrth i gyffro Harry Potter ledu ar hyd y DU am y tro olaf. Ond peidiwch â gofidio, mae un awdur, sef Nicholas Daniels, yn benderfynol o fanteisio ar yr ysfa hon am bob peth hudol, wrth iddo gyhoeddi ei lyfr diweddaraf i blant, Y Llyfr Ryseitiau: Gwaed y Tylwyth.

Fel y dywed yr athro ysgol gynradd, a ddaw yn wreiddiol o Lanelli ond sydd bellach yn byw yng Nghaerdydd: ”Pan gychwynnodd ffenomen Harry Potter, teimlais rywfaint o dristwch o ran Cymru, gan fod gennym draddodiad aruthrol o gyfoethog ym maes chwedloniaeth a mythau. Er bod y straeon yn wych, ac er bod y plant wrth eu boddau yn gwrando arnynt, mae’n rhaid i ni ddiweddaru’r themâu er mwyn iddynt apelio at genhedlaeth newydd.”

Felly aeth ati i ysgrifennu am rywbeth y credai y byddai’r plant yn ei ddosbarth ef yn mwynhau. Mae’r llyfr yn dilyn hanes Gwiddan, sef merch tair ar ddeg oed, sy’n cael hen lyfr ryseitiau ei nain yn anrheg pen-blwydd. Er ei bod wedi’i siomi i ddechrau, cyn hir mae’n darganfod bod llawer mwy i’r llyfr ryseitiau na’r hyn sy’n ymddangos ar yr olwg gyntaf.

“Yr unig reswm y dechreuais ysgrifennu oedd oherwydd ‘mod i’n gweld, yn sgil fy ngwaith, pa mor anodd yw cael plant i ddarllen, yn enwedig yn Gymraeg,” esboniodd Nicholas. “Felly dyna oedd fy mhrif nod bob tro – i ysgrifennu rhywbeth y byddai plant rhwng 9 a 12 mlwydd oed wir am ei ddarllen. Er mai merch yw prif gymeriad y llyfr, nid yw’n llyfr merchetaidd; mae’n eithaf tywyll a sinistr ac rwy’n gobeithio y bydd bechgyn a merched fel ei gilydd yn ei fwynhau.”

Yn ogystal â stori afaelgar, roedd Nicholas yn awyddus i ysgrifennu llyfr a fyddai o fewn cyrraedd cynifer â phosibl o blant Cymraeg eu hiaith: “Mae llawer o’r plant dwi wedi eu dysgu’n cael iaith a chystrawen rhai o’r llyfrau Cymraeg yn eithaf anodd. Mae’n ddieithr iddyn nhw, yn enwedig os nad ydyn nhw’n siarad Cymraeg adref. Dwi am i blant deimlo’n gysurus gyda’r iaith, a dyna sut y cawn ni fwy o blant i siarad Cymraeg.”

A chan ddibynnu ar lwyddiant y gyfrol gyntaf, mae gan Nicholas rai syniadau yn barod ar gyfer y llyfr nesaf:”Rwyf wedi dechrau chwarae â rhai syniadau, ond bydd rhaid i ni aros i weld a yw’r plant am gael mwy ai peidio!”, meddai gan chwerthin.

Ychwanegodd Catrin Hughes o’r cyhoeddwyr, Gwasg y Dref Wen: ”Mae llwyddiant cyfres Harry Potter wedi profi bod galw am y math hwn o ddeunydd ymhlith y grŵp oed hwn. Fodd bynnag, nid yw’r farchnad Gymraeg yn bodloni’r galw hwn ar hyn o bryd. Ein gobaith ni fel cyhoeddwyr yw y bydd ‘Y Llyfr Ryseitiau’ yn llenwi’r bwlch rhywfaint. Mae’n llyfr anghyffredin iawn sy’n plethu ffantasi a realiti ac mae digon o gyffro ac antur ynddo i gynnal diddordeb darllenydd ifanc - yr union beth ar gyfer gwyliau hir yr haf!”