More adventures with the hot-headed teenager. A sequel to Sgribls Hogan Flêr and Snogs a Sgribls Hogan Flêr

Mwy o helyntion y ferch benboeth yn ei harddegau - dyddiadur sy'n ddilyniant i Sgribls Hogan Flêr a Snogs a Sgribls Hogan Flêr.

Dyma ddilyniant i ddau lyfr arall gan Gwen Lasarus sy’n adrodd hanes merch ifanc o’r enw Corin. Yn y gyfrol ddiweddaraf hon mae ei bywyd eto’n llawn cyffro a helyntion.

Dyddiadur merch pedair ar ddeg oed sy’n berchen ar ystafell flêr yn llawn dillad budr ydy o. Mae hi yn ferch i un o brif edmygwyr Bryn Fôn, yn chwaer i Gethin (Zwi Bon o’r Blaned ZwiB) ac mae ei thad yn actio’n rhyfedd iawn wedi iddo dderbyn llythyr o Siapan. Dilynwn brofiadau Corin wrth iddi dyfu’n ddynes a sylweddoli bod ei bronnau’n tyfu’n sydyn. Creisus go iawn! ‘ O diar! Ro’n i newydd feddwl am rywbeth . . . Lle ro’n i’n mynd i’w rhoi nhw rŵan?!’ Wrth gwrs mae’r hogiau yn yr ysgol wrth eu boddau, yn enwedig Medwyn Parry!

Darlun credadwy o fywyd merch ifanc a geir yma. Mae’n aelod o’r band ‘Bêbs’ gyda’i ffrindiau, yn hoff iawn o snogio hogiau lysh o YstaLYFera yng ngwersyll Glanllyn ac yn flin pan benderfyna ei ffrind, Poli, ei bod am droi’n goth! ‘Chdi yn Goth – ma’r peth yn hollol bananas. Ta-ra a joia dy reid.’

Ond nid dyna’r unig bethau cyffrous sy’n digwydd ym mywyd Corin ! Mae’r llythyr o Siapan yn dipyn o sioc i’r teulu cyfan ac am newid eu bywydau am byth. Mae Corin ei hun wrth ei bodd gyda’r newyddion gan ei bod hi a’i brawd ’nawr yn cael eu trin fel ‘mini-selebs’ yn yr ysgol.

Llwyddodd yr awdures i gyfleu teimladau merch ifanc a chyflwyno profiadau Corin yn ddifyr a hwyliog. Mae Swshi, Snogs a Sgribls Hogan Flêr, fel y ddwy nofel flaenorol, yn llawn hiwmor ac yn hawdd ei darllen, a bydd yn sicr o apelio atoch chi ferched ifanc yn eich arddegau yn arbennig. Heb i mi ddatgelu dim ymhellach, fe welwch fod Corin yn gymeriad hawdd iawn uniaethu â hi! Mynnwch ei darllen!

Ffion Furci

Gellir defnyddio'r adolygiad hwn at bwrpas hybu, ond gofynnir i chi gynnwys y gydnabyddiaeth ganlynol: Adolygiad oddi ar www.gwales.com, trwy ganiatâd Cyngor Llyfrau Cymru.

It is possible to use this review for promotional purposes, but the following acknowledgment should be included: A review from www.gwales.com, with the permission of the Welsh Books Council.