See what other Customers have written about this title:

Dylan Lewis from Llanbedr Pont Steffan rated this title and wrote:

"Detholiad o Adolygiad a ymddangosodd yn CLONC - Papur Bro Llanbedr Pont Steffan a'r fro – Tachwedd 2005. Prif nod yr awdur mewn cyfweliad ar y teledu oedd ceisio cael rhai o’i ffrindiau i ddarllen nofel Gymraeg. Os na fydd Gary Slaymaker yn llwyddo i wneud hyn gyda’r nofel unigryw hon, rwy’n ofni na wnaiff neb hynny. Dyma nofel fywiog yn llawn hiwmor gydag apêl eang iddi. Hyrwyddwyd y nofel ar yr un raglen deledu fel nofel bêl-droed. Dylai apelio at fechgyn yn arbennig. Fel un heb owns o ddiddordeb mewn pêl-droed, roeddwn yn ofni na fyddwn yn ei mwynhau. Ond gallaf ddweud heb flewyn ar dafod, nad oes angen bod yn hwligan pêl-droed hyd yn oed i ddeall a chwerthin am anturiaethau tîm Dynamo Cwmann. A dyna ddod â ni at yr apêl leol a oedd wedi ysgogi’r chwilfrydedd ynof. Roeddwn eisiau darganfod pwy oedd y bobl leol tu ôl i gymeriadau’r nofel a faint o debygrwydd oedd rhwng Cwmann y nofel a Chwmann y pentref go iawn yr ydym ni yn byw ynddo. Defnyddir enwau lleoedd sy’n adnabyddus i ni fel: Tafarn y Ram (sy’n ganolbwynt i nifer fawr o gyfarfodydd a gwrthdaro), Cae Coedmor, afon Hathren, siop fwyd Sineaidd Llambed a thîm pêl-droed Ffarmers, Cribyn a Llanwenog. Maen nhw’n llefydd y gallwn ni eu gweld yn glir yn ein meddyliau wrth ddarllen y nofel. Ond eto ceir tipyn o ddychymyg hefyd wrth sôn am Siop Drydan y pentref (a roddodd enw’r Dynamo i’r tîm) a nifer o ffermydd gwreiddiol. Efallai mai dim ond awdur sydd wedi byw mor bell o’r ardal ers cynifer o flynyddoedd sy’n gallu gwneud hyn yn llwyddiannus – defnyddio lle go iawn ac ychwanegu mwy iddo er mwyn cael lleoliadau delfrydol i’r digwyddiadau. Gallaf adnabod ambell un o drigolion yr ardal hon yn y cymeriadau, ond dim ond ambell un. Dywed Gary ei fod wedi selio’r cymeriadau ar bobl y mae’n eu hadnabod ond, i fi, mae llawer o Gary Slaymaker ei hun yn y rhan fwyaf o’r cymeriadau. Gallaf ei glywed e yn yngan y perlau a ddaw allan o enau nifer fawr o gymeriadau’r nofel – y geiriau bachog, y tynnu coes ac wrth gwrs y rhegi. Mae gwybodaeth y cymeriadau o ffilmiau hefyd yn ein hatgoffa mai arbenigwr ffilmiau yw awdur y nofel. Mae’n siwr y bydd nifer yn feirniadol o’r nofel hon oherwydd yr iaith liwgar sydd ynddi. Ond mae awduron eraill, sydd wedi hen ennill eu plwyf, wedi sefydlu rhegfeydd yn y nofel Gymraeg erbyn hyn. Enillodd Caryl Lewis wobr Nofel y Flwyddyn am ei nofel Martha, Jac a Sianco. I’r rhai ohonoch sydd wedi darllen y nofel honno, ni allwch ddarllen heibio’r frawddeg gyntaf heb ddod ar draws rheg. Mae’r elfen o sioc wrth gynnwys rhegi mewn llenyddiaeth yn rhywbeth sy'n perthyn i'r gorffennol erbyn hyn, ac yn hytrach na cheisio bod yn cŵl, mae Gary Slaymaker a Caryl Lewis ond yn llwyddo i adlewyrchu’r ffordd o siarad yn ein cymunedau. Pwy ddaeth ar draws tîm pêl-droed sydd ddim yn rhegi beth bynnag? Byddai’r nofel hon yn dlotach o lawer heb hyn. Ond yn fwy na’r rhegi, ysgrifenna Gary yn nhafodiaith hyfryd yr ardal. Mae’r cyfan a ddywedir gan y cymeriadau mor fyw ac mor real i mi. Chewch chi ddim nofel mwy addas i ni, bobl Cwmann a Llambed, na Y Sach Winwns. Os na ddarllenwch chi hon, fyddwch chi byth yn darllen nofel Gymraeg. Mae’r stori yn cydio ynoch. Byddwch yn cydymdeimlo a chymeriadau’r nofel yn gwmws fel pe byddech yn cydymdeimlo â thrigolion eich pentref chi. Bydd un bennod yn arwain at y llall. Does dim themâu trwm ynddi na gormod i wneud i chi feddwl, dim ond adloniant pur a llond tŷ bach (yn dibynnu ar ble fyddwch yn darllen fel arfer) o chwerthin. Efallai ei fod wedi ymestyn y stori braidd mewn mannau. A fyddai rhywun mewn pentref gwledig fel Cwmann wedi mynd mor bell i gyflogi Witch Doctor? A tybed a oedd Gary Slaymaker wedi yfed un peint bach yn ormod cyn ysgrifennu am yr hyn ddigwyddodd ar y cae yn ystod y gêm derfynol? Ta beth, yn ystod y darlleniad, bûm i’n chwerthin ar dop fy llais gan feddwl fy mod ar Gae Coedmor a Thafarn y Ram gyda nhw. Daeth deigryn i fy llygaid, yn ogystal â gwên i fy wyneb, wrth ddarllen am yr angladd yng Nghapel ‘Bethania ar dopiau Cwmann’ hefyd. Rydym yn ffodus fod Cwmann, y pentref go iawn, yn bentref yn llawn gweithgarwch, ond siom a ddaeth i mi ar ôl gorffen darllen y nofel. Sylweddolais nad oes tîm pêl-droed yn y Cwmann go iawn a bod Tafarn y Ram yn dal ar gau. Prysured y dydd pan fydd Gary Slaymaker yn cyhoeddi ail nofel am anturiaethau’r Dynamo. Rwy’n siwr fod digon o ddeunydd yn y cymeriadau eto i lanw nofel arall. Rwy’n edrych ymlaen at ailymuno â nhw yn Ram y nofel a’r Ram go iawn, yn y pentref sy’n adnabyddus i Gymru gyfan erbyn hyn, diolch i Gary Slaymaker. Dylan Lewis "