Y cyflwynydd teledu o ongl arall

Rhaglenni plant bach, cyflwyno ‘Dechrau Canu, Dechrau Canmol’, canu a diddanu – dyna i chi’r amryddawn Martyn Geraint. Ond erbyn hyn fe all ef ychwanegu awdur at y rhestr wrth i’w nofel gyntaf i blant, O Ongl Arall, gael ei chyhoeddi gan Wasg Gomer. Wedi cyflwyno Planed Plant am bedair blynedd ar ddeg a chynnal sesiynau difyr a bywiog gyda phlant ifanc ar hyd a lled Cymru, mae’n dipyn o syndod taw nid ar gyfer y gynulleidfa ifanc iawn y lluniodd y stori hon. Llyfr yng nghyfres Whap! ar gyfer darllenwyr 11+ oed yw O Ongl Arall ac mae’n siwr bod hoffter meibion yr awdur o bêl-droed wedi bwydo’i ddychymyg wrth fynd ati i greu’r nofel.

‘ Y cyfan dw i’n ei wybod yw fod rhywbeth rhyfedd yn digwydd i mi weithiau pan wy’n barod i saethu o flaen y gôl yma. Mae fel tase rhywbeth yn gafael yn ‘y nhroed i!’ ‘ Ie, ie! ‘Na’r esgus gorau ‘to!’

Mae gan bêl-droedwyr resymau ac esboniadau dros eu diffygion o hyd a’r reffarî yn aml yn cael bai ar gam. Ond glywodd Tom, y reffarî pymtheg oed, erioed y fath esgus â hwn ac mae’n awyddus i ganfod yr atebion. Wrth ddychwelyd i’r parc yn hwyr un noson, mae’n dechrau ar antur fwyaf cyffrous ei fywyd!

Dyma stori’n llawn cyffro a’r ffin rhwng y presennol a’r dychymygol yn hoelio sylw’r darllenydd. Fel y cymeriad Tom yn O Ongl Arall, bu un o feibion Martyn Geraint yn hyfforddi i fod yn reffarî pêl-droed, ac rwy’n siwr iddo adrodd sawl stori i’w dad hefyd!