A volume in the Barddoniaeth Boced-din series. A compilation of humorous poems by Edgar Parry Williams.

Cyfrol yn y gyfres Barddoniaeth Boced-din. Y tro hwn, ceir limrigau, penillion a rhigymau gan Edgar Parry Williams, aelod o dîm talwrn 'Y Manion o'r Mynydd'.

Dyma gyfrol arall yn y gyfres boblogaidd Barddoniaeth Boced-din, ac ynddi fe gawn amrywiaeth o limrigau, penillion ymson, beddargraffiadau, caneuon, penillion mawl a dychan, telynegion a pharodïau.

Clywir enw Edgar Parry Williams yn aml yn y Babell Lên yn y Brifwyl adeg beirniadaeth limrig y dydd oherwydd mae Edgar yn un o'n limrigwyr mwyaf llwyddiannus.

Dyma ychydig enghreifftiau o'r adran limrigau:

Roedd Wil Foty Ganol yn gwybod
Na lwyddodd ei fam i ddarganfod
Ai gan Wil Foty Ucha
Ynteu Wil Foty Isa'
Y cafodd o glustia mor hynod.

Mae Edgar wedi bod yn ddigon beiddgar i gyhoeddi'r limrig hwn; gobeithio na fydd yr heddlu yn llym wrtho:

Mi glywais am ddynes fach addfwyn
A syrthiodd mewn cariad â mochyn,
Mi'i bwydodd o'n fras
Nes aeth yn ddulas:
Mae'n heddwas yn awr ym Mae Colwyn.

Mesur poblogaidd iawn yw'r limrig, ac mae gan y limrigwr hwn gyfoeth o syniadau:

Wrth groesi'r ffordd fawr yn y Bala
Fe gollodd hen wreigan ei 'sgidia,
‘Meri Jones ydach chi?’
Meddai plismon yn hy',
‘Na, na,’ meddai hi, ‘Cinderella’.

Ym 1993 mi ymwelodd y Brifwyl â safle'r Sioe Amaethyddol yn Llanelwedd, a dyma limrig a luniwyd ar yr achlysur:

Mae pethau'n wahanol eleni
Ar safle sioe fawr y stalwyni
Lle bu brefu a rhoch
Y gwartheg a'r moch
Mae beirdd digon coch yn cystadlu.

O blith y Penillion Ymson dyma un digon difyr, sef ‘Wrth Wylio Comed’:

Ar wib ar draws y gofod
Yr ei fel hediad brân,
A mynd fuaswn inna
Pe tasa nhin ar dân.

Yn gymysg â'r ysgafnder a'r digrifwch, mae yma delynegion sy'n taro'r darllenydd yn ei dalcen. Dyma enghraifft:

Yn Angladd Bedwyr

Mor ddifyr y traethai
Am Arthur a'i lu,
Caledfwlch, Afallon
A'r llong hwyliau du.
Mor ddu â phenllanw
Y dyrfa syn
Fu'n talu gwrogaeth
Yng Nghapel Tŵr Gwyn.

Diolch, Edgar, am gyfrol y bu yn werth aros amdani.

Dai Rees Davies

Gellir defnyddio'r adolygiad hwn at bwrpas hybu, ond gofynnir i chi gynnwys y gydnabyddiaeth ganlynol: Adolygiad oddi ar www.gwales.com, trwy ganiatâd Cyngor Llyfrau Cymru.

It is possible to use this review for promotional purposes, but the following acknowledgment should be included: A review from www.gwales.com, with the permission of the Welsh Books Council.