Dyma stori ryfeddol Julian Lewis Jones, y bachgen o Frynteg, Sir Fôn dreuliodd gymaint o’i blentyndod yn y cysgodion oherwydd salwch creulon. Dyma’r bachgen swil a oedd wedi ei ynysu mewn gwersi ymarfer corff ac a gollodd gymaint o wersi yn yr ysgol oherwydd problemau anadlu.

Ond y cyfnod rhwystredig hynny a roddodd egni i Julian frwydro ymlaen. Pysgota oedd y ddihangfa, y ffocws newydd i’r Julian ‘gwan a swil’. “Wn i ddim lle fyddwn i petai’r pysgota heb gydio,” datgelai. Roedd y codi pwysau yn ddihangfa arall, cyn iddo gryfhau a chodi pac am ddinasoedd Lloegr ac yna America pan yn 20 oed.

Mae’r daith yn un lliwgar, amrywiol a byrlymus wrth wibio trwy fywyd yr actor a’r cyflwynydd sydd bellach wedi ymgartrefu yn Nantgaredig Sir Gaerfyrddin. Wrth lamu o un swydd i’r llall, o Alwminiwm Môn i sawl gym yn Llundain ac America, o Harrods i bacio rhew yn California, cyn mentro i fyd actio a chael cyfweliad ‘diddorol’ yng ngholeg RADA. Ac yna er gwaethaf y rhai a oedd yn amau a fyddai’n llwyddo, cael ei dderbyn i Goleg Brenhinol Cerdd a Drama Caerdydd.

Mae’n stori emosiynol am dad yn colli genedigaethau ei blant oherwydd yr ofn o golli bywoliaeth a dod â phlentyn i fyd ansicr. Mae yna ddagrau wrth drafod Theatr Clwyd yn ogystal â’r wefr o weithio yn y theatr honno ac ar ffilm Y Weithred. Ac yna’r boddhad o gael cynnig gwaith ar gyfresi Where The Heart Is, Caerdydd, Belonging ac yn fwyaf diweddar, Stella.

Ac yn binacl i’r cyfan, mae’r atgofion am yr alwad ffôn a dderbyniodd pan yn y car ym Mhont-ar-gothi, galwad a newidiodd bopeth – cael cynnig rhan yn ffilm fawr Clint Eastwood, Invictus am fywyd Nelson Mandela, ac un o ddiddordebau penna’ Julian, rygbi!

Wedi iddo gyfarfod â’r tîm am y tro cyntaf yn San Diego, o bob man, mae perthynas Julian â’r Sgarlets yn amlwg yn y gyfrol hon yn ogystal â’i gyfeillgarwch agos â Grav.

Mae yna straeon difyr am hynt a helynt y byd actio ym mhob cwr o’r byd. A dyma hunangofiant gonest a di-flewyn-ar-dafod ar brydiau, am fyd y ddrama a’r gynulleidfa Gymraeg, a sut effeithiodd hynny ar hyder Julian.

Gyda gwialen bysgota yn gadarn yn ei law, cawn wybod sut y cododd yr hogyn swil o Storws Wen, Brynteg allan o’r cysgodion, i ganol y llwyfan.