A collection of Welsh poems with colourful and attractive images. The book includes poems on numerous themes including food, clothes, travel and the weather. An audio CD of all the poems recited comes with the book. Every poem has its own vocabulary box making it accessible for Welsh learners.

Casgliad o gerddi blasus gyda lluniau lliwgar a deniadol. Ceir cerddi ar amryw o themâu gwahanol gan gynnwys bwyd, dillad, teithio a'r tywydd. Fe geir geirfa ar bob tudalen yn ogystal â CD sain o'r holl gerddi yn cael eu hadrodd, sy'n gwneud y casgliad yn addas ar gyfer dysgwyr yn ogystal â siaradwyr Cymraeg iaith gyntaf.

Dyma gyfrol werth ei phrynu i'r cartref ac i'r ysgol. Cyfuniad o gerddi traddodiadol a chyfoes a geir yma, cerddi sy’n cyffwrdd â phob agwedd: y synhwyrau, chwaraeon, hamdden, teithio, Nadolig, yr amgylchedd a llawer mwy. Sgram go iawn! Mae'r cerddi'n syml ac yn apelgar gan gynnwys gwahanol dafodieithoedd gydag amrywiol fesurau a phatrymau barddonol. Hoffais y parodïau ar yr hwiangerddi, y gwahoddiadau ar ffurf penillion, y limrigau a'r cerddi wedi'u hysgrifennu ar ffurf siapau. Mae'r gyfrol yn gyforiog o syniadau ar sut i ddenu plant at farddoniaeth a hefyd yn eu hannog i lunio ambell bwt o gerdd eu hunain. Syniad da oedd rhoi geirfa mewn bocs lliw ar bob tudalen.

Mae'r amrywiaeth o wahanol luniau ar bob tudalen yn fendigedig. Maent yn llawn manylder di-ben-draw ac yn gyfrwng ardderchog i ennyn sgwrs a thrafodaeth. Roedd ychwanegu'r cryno-ddisg yn syniad da hefyd ac yn adnodd gwerthfawr – mae'r amrywiol leisiau sy'n darllen y cerddi'n hyfryd. Beth am fentro i greu disg rhyngweithiol?

Gaenor Watkins

Gellir defnyddio'r adolygiad hwn at bwrpas hybu, ond gofynnir i chi gynnwys y gydnabyddiaeth ganlynol: Adolygiad oddi ar www.gwales.com, trwy ganiatâd Cyngor Llyfrau Cymru.

It is possible to use this review for promotional purposes, but the following acknowledgment should be included: A review from www.gwales.com, with the permission of the Welsh Books Council.