Stori liwgar a difyr ar ffurf rhigymau am lygoden fach gyfrwys yn llwyddo i osgoi cael ei bwyta gan greaduriaid y goedwig; i blant 5-8 oed.

A colourful and amusing story in verse form about a cunning little mouse which succeeds in avoiding being eaten by forest creatures; for 5-8 year old children.

Dyma stori fach hyfryd – un ddoniol, clyfar a bywiog. Cawn hanes llygoden fach llawn cymeriad yn mynd am dro i’r goedwig, ac yn gyfrwys iawn yn llwyddo i osgoi cael ei bwyta gan lwynog, tylluan a neidr; mae'n troi’r byrddau'n llwyr ac yn annisgwyl iawn pan ddaw wyneb yn wyneb â’r gryffalo ei hun.

Mae’r cymysgu hwn rhwng anifeiliaid go-iawn (gan efallai ysgogi trafodaeth bosibl ynghylch bwydydd gwahanol anifeiliaid) a’r gryffalo dychmygol yn ddigon credadwy, ac mae hi’n stori ddifyr tu hwnt.

Ceir yma luniau mawr a lliwgar, ac rwy’n arbennig o hoff o’r olwg ar wynebau’r anifeiliaid – maent yn stori ynddynt eu hunain! Gan fod y lluniau yn llenwi’r tudalennau nid oes ormod o ysgrifennu i ddychryn y rhai sy’n dechrau darllen ar eu pennau eu hunain. Hefyd, oherwydd fod gan y stori adeiladwaith debyg i’r chwedlau traddodiadol i’r plant (megis y tri mochyn bach ac Elen Benfelen), ceir cryn dipyn o ailadrodd yr un strwythur wrth gyfarfod cymeriadau gwahanol.

Ac mae’r addasiad Cymraeg yn benigamp – y cwpledi odledig yn llyfn a llithrig ac yn chwipio’r stori yn ei blaen yn fywiog. Dotiais yn aml at y dweud, o’r llwynog yn byw yn y ‘cwtsh dan staer’, i’r ‘sbageti-tylluan-bolanê’ i’r ‘brechdan blwmin Gryffalo’.

Llyfr gwych!

Gwenllïan Dafydd

Gellir defnyddio'r adolygiad hwn at bwrpas hybu, ond gofynnir i chi gynnwys y gydnabyddiaeth ganlynol: Adolygiad oddi ar www.gwales.com, trwy ganiatâd Cyngor Llyfrau Cymru.

It is possible to use this review for promotional purposes, but the following acknowledgment should be included: A review from www.gwales.com, with the permission of the Welsh Books Council.